Remata o proceso de reincorporación e posta ó día no arquivo municipal de Soutomaior

Persoal técnico da Deputación ven de rematar o proceso de reincorporación documental, que inclúe a actualización e informatización da información do arquivo municipal de Soutomaior, logo da pertinente actuación sobre os fondos documentais producidos nos últimos dous anos, coa intención de mellorar a súa conservación e permitir a pronta localización para o uso en manexo no funcionamento da Administración e no seu caso por parte dos cidadáns interesados.

O Servizo Técnico do Patrimonio Documental organizou o conxunto documental, coa mesma estrutura e formulación técnica có resto da provincia, continuando os procesos xa desenvoltos neste arquivo municipal nos anos 1991,1994, 2006, 2007, 2008 e 2010. Elaboráronse os instrumentos de control e información necesarios: cadro de clasificación, inventario somero e inventario detallado, utilizando para isto os medios informáticos habituais, destacando entre eles a base de datos do inventario detallado, con 16.026 rexistros.

O resultado final supón que o concello conta cos seus fondos documentais organizados, nun total de 2.136 unidades de instalación que conteñen documentos dende 1853 ata o 2012.

Fisicamente disponse a documentación en tres locais debidamente habilitados para esta finalidade, dous deles no baixo cuberta e o terceiro no semisoto habilitado no seu día logo da ampliación da casa do concello, contando este último con estantería compactada.