A Deputación mellorará as instalacións dos clubs de remo San Bartolomé e Tirán, de Moaña

Louzán reuniuse esta mañá co alcalde de Moaña e cos presidentes dos clubs, aos que lles confirmou o compromiso da administración provincial

A Deputación Provincial de Pontevedra investirá 30.000 euros nas obras de mellora e acondicionamento das sedes dos clubs de remo San Bartolomeu de Meira e Sociedade Deportiva Tirán, en Moaña, segundo lle confirmou esta mañá o presidente da Deputación, Rafael Louzán, aos presidentes dos clubs e ao alcalde de Moaña, nunha xuntanza celebrada no Pazo Provincial.

O orzamento dos traballos será de 15.000 euros para cada club e permitirá corrixir as deficiencias que presentan ambos edificios e que foron comprobadas in situ pola deputada provincial, Begoña Estévez, nunha visita realizada a Moaña a finais de maio.

A recepción de Rafael Louzán aos presidentes dos clubs de remo prodúcese despois da entrevista mantida fai uns días co alcalde de Moaña, onde José Fervenza lle trasladou a necesidade de mellorar unas instalacións deportivas que son usadas a diario por numerosos deportistas.

Os presidentes dos clubs sinalaron que a principal necesidade do San Bartolomeu é a reforma dos vestiarios, co obxectivo de dotalos de máis espazo para as numerosas mulleres que na actualidade compiten neste club, así como a dotación dun quentador de auga con maior capacidade, dado que nos últimos anos se incrementou notablemente o número de usuarios do centro.

En canto á Sociedade Deportiva Tirán, presenta goteiras e humidades, danos na cuberta e gretas exteriores.

Rafael Louzán amosou o compromiso da Administración provincial co deporte, o que tamén inclúe a construción e mellora de infraestruturas deportivas, xa que delas depende que se poida practicar a actividade física de forma axeitada.