A Deputación alcanza un acordo coa Asociación de Gaiteiros Galegos para poñer en marcha unha escola de música tradicional fusionada co proxecto existente na actualidade

José Juan Durán afirmou que o organismo provincial sempre defendeu “a conservación, a posta en valor a protección e o respecto do patrimonio cultural galego”

A Deputación de Pontevedra alcanzou un acordo coa Asociación de Gaiteiros Galegos para poñer en marcha unha escola de música tradicional na que estarán fusionados o proxecto presentado por este colectivo e o que actualmente se está a desenvolver en diferentes puntos da provincia en colaboración coa Asociación Banda de Gaitas Provincia de Pontevedra. Esta medida foi consensuada esta tarde nunha reunión que mantivo o deputado delegado de Cultura, José Juan Duran, con Santiago Caneiro, presidente da Asociación de Gaiteiros Galegos e outros representantes desta entidade.

José Juan Durán expresou a súa satisfacción por ter acadado este acordo e recordou que dende o primeiro momento a Deputación sempre defendeu “a conservación a posta en valor a protección e o respecto do patrimonio cultural galego”, tal e como ven recollido no convenio asinado o pasado día 6 de abril coa Asociación Banda de Gaitas Provincia de Pontevedra. Do mesmo xeito, Durán agradeceu o diálogo e a boa dispoñibilidade da Asociación de Gaiteiros Galegos, así coma seu interese por preservar a música galega tradicional, “propósito que compartimos dende a Deputación de Pontevedra”, finalizou.

O novo proxecto fusionado contará cunha subvención de 100.000 euros que aportará a Deputación e comezará a funcionar entre os meses de setembro e outubro. Unha vez adoptado este acordo simplemente quedarán por resolver os detalles formais necesarios para poñelo en marcha.